جار القمر

حسنا .. اعتذر ان جاءت كلماتى غير واضحة او مبهمة .. ولهذا سا عيد ما قصدته من جديد مع ملاحظاتى الجديدة على مداخلتك..

1- التدوينة اللى كتبتها تم تسجيلها وقت غضبك .. فى ثورة غضبك على ما اعتقد وبالتالى مش قدرت توصل فكرتك كويس للناس وده اللى عمل لبس فى الموضوع من البداية .. اكيد يعنى انت مش متوقع من نفسك تكون واضح وافكارك سلسة وقت الغضب

وافتكر انك بمجرد ما كتبت التدوينة -برغم وجودها فى المساحة الخاصة بيك- فانت عرضتها للمناقشة والا كنت اكتفيت بانك تتناقش مع اصحابك وخلاص على كده .. وبالتالى اتمنى انك تتقبل وجهة نظر الاخر مادمت فى حدود المعقول

2- بالنسبة للطريقة اللى عبرت بيها عن غضبك .. انا فضلت انى مش اعلق عليها فى مداخلتى اللى فاتت .. وبرضه هاتجاهلها المرة دى .. لكن حبيت بس الفت انتباهك ان غضبك هايقف حائل بين فهمى وطريقة تعبيرك .. لانى مش بقدر افهم اللى انت عاوز توصله بالظبط

3- اتفهم جيدا شعورك بالاحباط لانى اشاركك فيه لكنى على الاقل بحاول اقاومه ومش بستسلم ليه

4- انا مش اتهمتك انك بتناضل وانت قاعد فى بيتكم او انك بعيد عن الناس .. انا تصفحت تدوينتك وقريت فيها ملاحظاتك عن الانتخابات وعارفة انك على الاقل مشارك فى الاحداث .. واصلا مش من حقى انى اتهم اى حد باى حاجة .. ومش معنى انى مختلفة معاك فى بعض نقاط انى فاهمة ان كلامى انا وحده الصح وكلامك هو الغلط .. بالعكس .. كلامى فيه نقط كتير تحتمل الصواب والخطأ زى كلامك بالظبط .. وكل اللى بحاول اعمله انى اوضحلك وجهة نظرى وانى اتناقش معاك ومش شرط حد فينا يقنع التانى مادام الاحترام على الاقل موجود .. والاختلاف فى الرأى لا يفسد للاحترام قضية .. ولا انت ايه رأيك؟

نيجى بقى لمداخلتك الجديدة ..

السلبية اللى انت بتتكلم عنها انا معاك فيها .. وكفاية قوى حكاية عبير العسكرى لما كانت كل ما تستنجد بحد فى الشارع الناس كانت بتصدق على الطول البلطجية اللى كانوا بيعيبوا فيها .. من غير واحد ما يحط بنته مكانها ويتأكد اذا كانت الناس دى صح او غلط

لكن برضه برجع وبسأل السلبية دى من ايه؟ .. اللامبالاة الفظيعة اللى عايشة فى الشعب المصرى واتأصلت فيه للدرجة من ايه؟؟ .. غلط فينا ولا غلط فى نظام قتل اى بذرة مقاومة على اعتبار اننا بقالنا اكتر من عمرى وعمرك بنقول ان مش فيه فايدة واننا مش هانغير الكون .. يعنى بنكدب ونصدق نفسنا

بالمناسبة .. رد على الفقرة التانية فى كلامك .. فى شريط العناوين الاخبارية فى التليفزيون المصرى خبر من وزارة الداخلية ان اى تجمع فى الطريق العام بدون تصريح يعتبر اشغال للطريق .. وبالتالى الداخلية لها كل الحق فى التعامل معاه بالطريقة اللى تشوفها مناسبة

خبر تانى بقى .. فى برنامج الملف الخاص على القناة الاولى بالتليفزيون المصرى .. حصل شبه تبرأ من القضاة من الناس اللى نزلوا الشارع وتضامنوا معاهم

جه على لسان المستشار احمد مكى من خلال مكالمة تليفونية ان اعتصام القضاة اللى اعلنوا عنه يوم 25/5 كان المفروض يقام داخل بهو دار القضاء العالى .. لكن لانهم راحوا ولقوا الامن قافل المكان اضطروا ينزلوا الشارع .. ومن غير هتافات .. وان الناس التانية (يقصد كفاية والاخوان) لما حاولا يندمجوا معاهم طلب القضاة منهم انهم يبعدوا عنهم علشان يعملوا حد فاصل يبقى واضح مين القضاة ومين عامة الشعب .. وانهم لم يطلبوا من احد ان يتضامن معهم وان استقلال القضاء مطلب شعبى .. ومع ذلك محظور على القضاة النزول الى الشارع والاختلاط بالعامة

المناقشات اللى تمت فى البرنامج بتؤكد ان ازمة القضاة مجرد شأن داخلى وان كل الاطراف اخطأت بشكل او باخر .. وان القضاة -للاسف- استغلوا الرأى العام للضغط على الحكومة لاقرار مشروع استقلال القضاء

ولا تعليق

وعلى فكرة .. انا معاك ان المظاهرات بدون اى قيمة وانها مش هاترجع حق .. لا هاتخرج علاء وندى واسماء والشرقاوى ولا هاتخلى مالك وفادى اسكندر يحضروا امتحاناتهم فى لجان كلياتهم زى كل سنة

الاخت المعلقة دى اللى هى انا طبعا .. وانا مش مشجعة للناس اللى راحت انضمت لتامر فى محاكمته .. انا بس حبيت اوضحلك ان الناس بتتظاهر بمزاجها بصرف النظر عن اهمية الشئ اللى بيتظاهروا عنه .. طبعا لا مجال للمقارنة بين الحدثين يوم الخميس ومع ذلك تامر انضم للتابوهات اللى بتتكلم عليها .. عارف ليه؟ .. لانهم حسوا ان تامر قدم شئ ليهم .. لكن القضاة بتنشف ريقهم على ما ياخدوا حقوقهم من المحاكم

لان تامر حسوا انه واحد منهم .. مش فى برج عاجى زى ما حاول المستشار حسن رضوان انه يؤكد اكتر من مرة فى برنامج الملف الخاص .. وانه يفهمنا انهم من طينة واحنا من طينة تانية .. وان اختلاطهم بالعامة غير مرغوب فيه .. طيب هو العز بن عبدالسلام اشهر قاضى فى تاريخ مصر كان بيعمل كده؟؟

هو فيه معارضة اصلا؟ .. انا مش عاوزة اكرر كلام اتقال اكتر من مرة .. بس انا مش حاسة ان فيه عندنا رأى ورأى اخر .. وساعات كتير بحس ان الناس اللى عندها رأى اصلا ناس شاذة جاية من المريخ مثلا

انت بتتكلم على ان المعارضة تحشد ناس .. يا ترى المعارضة تقدر تعمل كده فعلا؟؟ .. المعارضة بقت الوجه الاخر للسلطة .. وزى الناس ما فقدت الثقة فى النظام .. فقدت الثقة فى النص التانى كمان .. لانك علشان تقنعنى يوجودك لازم تورينى انجازاتك .. والكل عارف ان انجازات المعارضة = صفر

اسفة لانى طولت فى كلامى ... وجايز تكون مداخلتى دى مش هاتضيف اى جديد بالنسبة لك لكن انا مقتنعة ان التغيير مهما كان مش هايحصل غير مننا وبينا .. لكن كل اللى محتاجينوا وسيلة مناسبة تحطنا فى اطار محترم .. مش مجرد بغبغانات بتهتف وناس خارجة عن القانون