Submitted by jarelkamar on Wed, 07/23/2008 - 5:59pm.

ياريت كل يوم يبقى ثورة عشان ناخد أجازة و الشارع يفضى .. يا سلام لو كان الظباط الأحرار دول عملوا كذا ثورة على مدار الصيف .. و كلها تبقى ثورات مهمه .. مالهاش غنا عن بعضيها .. بحيث ايه فاهمني , لما ييجوا ينقوا يوم الأجازة مايعرفوش يختاروا انهي ويسيبوا انهي ..على اساس يعني يبقى نص الصيف اجازات .. يعني يوم يقولوا بيان ع الراديو .. و يوم يطردوا الملك .. و يوم يودعوا الملك و يوم يتاكدوا ان الملك وصل ( ضحكة ).. ويوم يعملوا الحكومة .. و يوم يأمموا عمر افندي .. ويوم يأمموا إيليت محطة الرمل .. و يعملوا كل يوم من دول اجازة .. فاهمني ؟؟ يعني عشان تبقى الثورة مفيدة بجد .. بس المشكله بقى ان كل يوم من دول حاييجي رد قلبي و بفة الافلام القلش بتاعت التليفزيون .. بس برضه تستاهل , قعدة البيت ماتتقدرش بمال

..

 انت عارف انا ليا دايما مزاج ارمي نظرات للبنات في الشارع و في المواصلات . خصوصا لو البت لا مؤاخذه مش حلوة قوي . بصراحة البت من دول بتبقى عايزة يتبصلها .. نفسيتها بتتحسن لما تلاقي شاب و شكله زي ماتقول كده نضيف و ابن ناس رماها نظرة يعني زي ماتقول كده اعجاب .. مع انها ماتستاهلش قوي .. ده يرفع معنوياتها قوي و يحسسها انها بنت بتتعاكس و بتاع .. اي ست في الدنيا تحب يتبصلها باعجاب .. يعني انت لو جت واحدة قالتلك لون قميصك عاجبني و لا شعرك حلو مش حاتنبسط ؟؟ اهم حاجه ايدك في مكانها ماتمدهاش ابدا .. خليك جنتل و بصبص بس بدافع خير في نفسك ..مش عشان لا مؤاخذه عايزها ..اعتبرها اختك و لا الستبتاعتك ماشية في الشارع

 

مقتطفات من حوار مع راكب زميل في ميكروباص ( منشية - عصافرة ) .. يوم 23 يوليو الحار جدا